【真心真意】
資訊科技越嚟越發達，好多仔女為表孝順，都會送智能手機俾父母，殊不知反而令到年長嘅父母無所適從，拎住部機完全唔知從何入手？有啲連電話都唔識接唔識打，更遑論其他應用程式喇！
為咗令老友記拎住部心意唔駛咁懊惱(有婆婆就曾因為唔識用退返俾仔女！)，智能電話訓練班實在有好大嘅銀髮市場！邊個做導師？咪小朋友囉！暑假大把時間，嚟中心做義工教公公婆婆就最啱㗎喇！舊年暑假有個80歲伯伯，就係因為小朋友嘅悉心指導，過去一年成日四圍走去捉精靈！
今年暑假，我再度同嗰間青少年服務中心合作，安排一班小義工嚟做導師，單對單教老友記學智能電話。
估唔到一位78歲伯伯學識智能手機後，今日特登託太太送咗張感謝咭俾我！好開心！好感動！
波波～多謝你！你太客氣喇！
買手機好容易，有money就可以！
送手機更容易，笑住俾就攪掂！
但送咗之後，如果大家能夠諗多一步，花多少少時間，教吓父母點用，咁禮物就唔會變成廢物、心意就唔會變成負累喇！
Search